ମୁମ୍ବାଇ : ‘ବେସରମ ରଙ୍ଗ’ ପରେ ଶାହରୁଖ ଏବଂ ଦୀପିକାଙ୍କ ଫିଲ୍ମ ପଠାନର ଦ୍ୱିତୀୟ ଗୀତ ମୁକ୍ତିଲାଭ କରିଛି । ଅତୀତରେ, ଫିଲ୍ମର ‘ବେସରମ ରଙ୍ଗ’ ଗୀତକୁ ନେଇ ଅନେକ ଚର୍ଚ୍ଚା ହୋଇଥିଲା । ଏହି ଗୀତଟି ଧାର୍ମିକ ଏବଂ ରାଜନୈତିକ ରଙ୍ଗ ମଧ୍ୟ ଦେଖିଥିଲା । ବିବାଦ ଏପର୍ଯ୍ୟନ୍ତ ଥଣ୍ଡା ହୋଇନାହିଁ ଫିଲ୍ମ ପଠାନ୍’ର ଦ୍ୱିତୀୟ ଗୀତ ‘ଝୁମେ ଜୋ ପଠାନ’ ରିଲିଜ୍ ହୋଇ ଯାଇଛି । ଫିଲ୍ମର ନୂଆ ଗୀତ ‘ଝୁମେ ଜୋ ପଠାନ’ ଗୁରୁବାର ରିଲିଜ୍ ହୋଇଛି । ଗୀତ ରିଲିଜ୍ ହେବା ମାତ୍ରେ ଏହା #Jhoome Jo Pathaan ସହିତ ସୋସିଆଲ ମିଡିଆରେ ଟ୍ରେଣ୍ଡ କରୁଛି ।
‘ବେଶରମ ରଙ୍ଗ’ ଗୀତ ପରେ ଦୀପିକା ଏବଂ ଶାହାରୁଖଙ୍କ ସିଜଲିଂ କେମେଷ୍ଟ୍ରି ପୁଣିଥରେ ‘ଝୁମେ ଜୋ ପଠାନ’ରେ ଦେଖିବାକୁ ମିଳୁଛି । ଏହା ଏକ ପାର୍ଟୀ ଗୀତ, ଯେଉଁଥିରେ ଶାହରୁଖ-ଦୀପିକା ସେମାନଙ୍କର ଦମଦାର ଡ୍ୟାନ୍ସ ମୁଵସ ପ୍ରଦର୍ଶନ କରୁଛନ୍ତି । ଏହି ଗୀତର ରଚନା ବିଶାଲ-ଶେଖର କରିଛନ୍ତି । ଏହି ଗୀତର ସ୍ୱର ଅରିଜିତ ସିଂ, ସୁକ୍ରିତି କକ୍କର ଏବଂ ବିଶାଲ ଶେଖର ଦେଇଛନ୍ତି । ‘ବେଶରମ’ର କୋରିଓଗ୍ରାଫର ବୈଭବୀ ମର୍ଚାଣ୍ଟ ହୋଇଥିବାବେଳେ ଏହି ଗୀତକୁ ବୋସ୍କୋ ଏବଂ କେସରଙ୍କ ଯୋଡି କୋରିଓଗ୍ରାଫି କରିଛନ୍ତି । ପଠାନର ଏହି ନୂଆ ଗୀତ ଆପଣଙ୍କୁ ମଧ୍ୟ ନାଚ କରିବାକୁ ବାଧ୍ୟ କରିବ ।
କହିବାକି, ପଠାନ ଚଳଚ୍ଚିତ୍ରର ପ୍ରଥମ ଗୀତ ‘ବେସରମ ରଙ୍ଗ’ ରିଲିଜ ହେବା ମାତ୍ରେ ବିବାଦ ଭିତରକୁ ଆସିଥିଲା । ଗୀତରେ ଦୀପିକାଙ୍କ ପୋଷାକ ଏବଂ ଏହାର ରଙ୍ଗକୁ ନେଇ ଅନେକ ବିବାଦ ଦେଖାଦେଇଥିଲା । ଦୀପିକାଙ୍କ ପୋଷାକର ରଙ୍ଗକୁ ଭଗୱା ସହିତ ଯୋଡି ଧାର୍ମିକ ଭାବନାକୁ ଆଘାତ ଦେଇଥିବାର ଅଭିଯୋଗ ଆସିଥିଲା । ଚଳଚ୍ଚିତ୍ର ବ୍ୟକ୍ତିତ୍ୱଠାରୁ ଆରମ୍ଭ କରି ରାଜନେତାମାନେ ଗୀତ ଉପରେ ବିବୃତ୍ତି ଦେଇଛନ୍ତି । ଏଥି ସହିତ ଶାହାରୁଖଙ୍କ ପ୍ରଶଂସକମାନେ ତାଙ୍କୁ ସମ୍ପୂର୍ଣ୍ଣ ସମର୍ଥନ କରୁଛନ୍ତି ।
